Rusiye Federatsiyasınıñ 18 yılğa azatlıqtan marum etilgen Aluştalı imam Lenur Halilovnı sağlıq vaziyeti sebebinden cezahaneden azat ettiler — onda onkologik hastalıq tapıldı, dep haber ete "Qırım birdemligi".
"Mahkeme, hastalıq sebebinden cezadan boşatuv aqqında RF Ceza kodeksiniñ 81 maddesini qullandı. Azat etilüv içün sebep, hastalığınıñ apis cezasına mania olğan cedvelde yer almasıdır", — dep aytıla haberde.
Tuvğanlarınıñ aytqanına köre, Rusiye Cezalarnı yerine ketirüv federal hızmetiniñ hadimleri oña Qırımğa qadar tren biletini satın alğanlar.
Şimdi Halilov Arhangelskteki apishanede buluna.
Lenur Halilov — Aluşta mustaqil musulman cemiyetiniñ sabıq yolbaşçısıdır.
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen "Hizb ut-Tahrir" islâm siyasiy firqasınen alâqaları bar dep qabaatladı.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
